محمد راكان قداح يكتب: زمان

سما الاردن | بقلم الاعلامي محمد راكان القداح 

زمان كان الحب غير وكان اله طعم ، زمان كانت كل اعيادنا يطغي عليها الحب وكانت كل ايامنا هي اعياد حب ، كنا نحب بعض ونحب الخير للغير . 

زمان كنا نقعد بهيك وقت وهيك جو حوالين صوبة البواري وكان ( فلها ) ليره كاز ، زمان كانت تنكة الكاز بليرتين وكنا نحب الكاز ونحب ريحته ، 

زمان ماكان عنا صوبات كهربا وماكان عنا ( #كبسة ) كهربا وماكان عنا احمال وكيلو واط للكهربا لانه ( النيون الابيض ) كان يحبنا وكنا نحبه ونحب ضوه ، 

كنا نحب الكستنا لانه الكيلو كان بليره وربع وكان الكيلو يكفينا ونوزع ع الجيران اشي اسمه ( طعمه ) .

زمان كنا نحب الدار وكنا نحب القعده وكنا نحب اللمه ، كنا نحب التلفزيون الاردني وكنا نحب نشرة الاخبار وكنا نحب مسلسل السهره .

زمان كان المذيع يقول اعزائي المشاهدين وكنا نحس بحبه النا ، 

كان الخير يحبنا ونحبه فكان دايما مترأس كل قعداتنا وكل نقاشاتنا .

للان بتذكر محصل الكهربا اللي كنا نحبه ويحبنا كنا نعرف موعده فنجهزله بريق الشاي وكان يقرا عداد الكهربا وكاسة الشاي بايده ( ايام ماكانت ساعة الكهربا متوسطه صدر البيت ) .

وكانت الفاتوره اذا نطت عن الخمس ليرات يعاتبك المحصل ويقولك ياابو فلان شو قصتك فبتقوله والله كان عند الجيران عرس لابنهم احمد ومدوا كهربا من عندي ( طبعا سهرات الشباب ايامها لاتقل عن ٣ ايام ) .

زمان كنا نحب كل شي وكل شي كان يحبنا ، كنا نحب الارض وكنا نحب البعض وبعض .

زمان ماكنا نعرف انه الكاز والبنزين يعتبروا محروقات الا لما صار الهم بنود ع فاتورة الكهربا .

زمان من كثر ماهو الكاز رخيص كانوا يلفوا فيه بالحارات زيه زي اسطوانة الغاز اللي كانت ايامها بليرتين وربع وبدها اثنين يشيلوها .

زمان كنا احلى وكنا انقى فكان الحب متصدر حياتنا وكان الحب طعمه غير .

زمان حتى حكوماتنا كانت تحبنا وكنا نحبها وكان اكبر مشاكلها مكافحة التصحر ومكافحة الاعتداء على المناطق الزراعيه ، 

وكانت اكبر مشاكل البلديات #كارميد_جبر .

ااااااخ يازمان واااااخ على ايام زمان .

واخ على حكومات كانت تعرف الحب .

 #محمد_راكان_القداح