فكونا من حقنا نفرح (أنداري)

خاص سما الاردن | موجة جديدة بلشنا نشوفها (ممنوع الفرح في الأردن)  ممنوع المهرجانات  ممنوع تبادل الثقافات ممنوع الاغاني موجة مزاودة  (بعنوان خالف تعرف) والمشكلة اللي بركبوا هذي الموجه مش مطبقينها على انفسهم  بتلاقي الواحد بكتب وحميان وما بصير ومش عارف شو وغلط اللي بصير وبتلاقي صفحتو كلها صور مع فنانين ومهرجانات وفعاليات بس خلص بدو يركب الموجه انا موجود .

يا جماعة الخير مش هيك فكونا منكم الفرح والسعادة طاقه ايجابية محفز للابداع والعمل والتغيير  ومش تعبير عن  عدم احساس بالوجع العام الكل متأثر من وضع البلد والكل حزين على اللي صار واللي بصير مش في البلد بس في كل الامة بس يعني هذا مش معناه نقتل الفرح في عيون اطفالنا وننزع الاحساس بالأمن من قلوب امهاتنا وزوجاتنا ونتحول الى مجتمع معقد نشوف الحياة بمنظار التشاؤم ونعيش حالة حداد دائم  ليش احنا قادرين نغير ونحول التحديات لفرص نجاح.

بكفي صارت (الكشرة الاردنية مضرب مثل) المفروض بدل ما نقعد نتصيد ونندب حظنا  مثل (اللطامات) وننتقد اي فعالية فيها فرح نساعد في صناعة الفرح ونتزود بالطاقة الايجابية لانها طريق النجاح ونتذكر المثل (العظماء من يبتسمون وسط العاصفة).

ونحن شعب عظيم نواصل الابتسام ونتخذ من السعادة زاد الطريق نحو صعود القمة وليبقى المعقدون في قعر الوادي يندبون حظهم بعد ان اقعدهم التشاؤم وخارت قواهم.

فكونا من عقدهم ولا تفرضوا علينا رأيكم وبلاش مزاوده عارفينكم ونقطه.

أنداري..